ILOILO CITY – Padayon ang monitoring sang Office of Civil Defense Region 6 may kaangtanan sa halit nga tuga sang Bagyo Quinta.
Sa interview sang Bombo Radyo kay Ma. Aletha Nogra, Disaster Risk Reduction and Management Division Chief sang Office of Civil Defense Region 6, iya ginpahayag nga naglab-ot sa 31 ka barangay gikan sa Antique kag Negros Occidental ang lubos nga naapektuhan sang bagyo.
Sa 31 ka mga barangay suno kay Nogra, naglab-ot sa 585 ka pamilya ukon 2,606 ka indibidwal ang naapektuhan.
Ginpahayag ni Nogra nga ang probinsya sang Antique ang ginpaidalom sa Signal warning samtang ang Negros Occidental naman ang ginpaidalom sa Rainfall Yellow warning bangud sa tuman ka munog nga ulan.
Sa bahin naman sang Iloilo, ginpahayag ni Nogra nga lunsay landslide, pagkatumba sang kahoy kag pagtaas sang water level sa suba ang na record sang Operation Center sang Office of Civil Defense.
Sa Aklan, may yara sang ginpatigayon nga clearing operation sa mga karsada nga indi maagyan bangud sa epekto sang bagyo.
May kaangtanan diri, ginapaaligmat ang mga residente nga naga-istar malapit sa suba sa posibe pag-awas sang tubig sa tion nga magpadayon ang pagbubo sang mamunog nga ulan.
Apisar sini, wala sang reported casualty magluwas lang sa missing person sa Carles, Iloilo nga sa subong, padayon pa nga ginapangita kag wala pa diri nalakip ang nalumos sa probinsya sang Antique.
