ILOILO – Ginapasigurado sang Flo Water Resources Iloilo Inc. nga potable ukon matinlo ang tubig nga gina-supply sa Metro Iloilo Water District apisar sang pagbubo sang mamunog nga ulan tuga sang Bagyo Quinta.
Sa interview sang Bombo Radyo kay Josephine Ilaguison, plant manager sang Flo Water Resources Iloilo Inc., iya ginpahayag nga sa subong, naglab-ot sa 8.25 meters ang level sang tubig sa water intake sang treatment facility.
Ang nasambit nga water level suno kay Ilaguison ang tuman ka taas kun ipaanggid sa maximum nga 3 meters nga normal water level.
Ginpahayag ni Ilaguison nga nagsaka sa 927 Nephelometric Turbidity Units ang katin-awon sang tubig kag kun wala naman naga-ulan, yara lamang ini sa 100-200 NTU.
Agud nga malab-ot ang 0-3 NTU, ginadugangan ang dose sang chemicals nga ginagamit sa water treatment agud malab-ot ang 0-3 NTU nga standard sang MIWD.
Magluwas diri, may yara naman sang ginapatigayon nga daily bacteria test, taste test, color test kag odor test agud masiguro nga matinlo ang tubig nga gina-supply sang bulk water.
