ILOILO – Pahanugutan na ang bulang sa probinsya sang Iloilo apang nagakadapat nga sundon ang minimum health protocol nga nakasaad sa Resolution 79 sang Inter-Agency Task Force.
Ini ang kasunod sang pagsinapol sang gamefowl breeders kag ni Iloilo Gov. Arthur Defensor Jr. may kaangtanan sa pagpatigayon sang bulang.
Sa interview sang Bombo Radyo kay Defensor, iya ginpahayag nga qualified ang Iloilo sa pagpatigayon sang bulang bangud nga ginpaidalom ang probinsya sa Modified General Community Quarantine.
Suno kay Defensor, magluwas sa pagsunod sa minim health protocol, nakadepende naman sa tagsa ka Local Government Unit kun bala hatagan sang permit ang pagpatigayon sang bulang.
Ginkalipay naman sang gamefowl breeders association ang nasambit nga development.
Sa interview sang Bombo Radyo kay Ricoy Palmares, Presidente sang Panay Gamefowl Breeders Association, iya ginpahayag nga kun wala pa ginpahanugutan ang bulang, indi malayo nga ila na lang nga ihawon ang hinuptanan nga manok bangud sa kapiyerdihan.
Suno kay Palmares, ginalauman nga maga-umpisa ang pagpatigayon sang bulang sa tunga-tunga sang Nobyembre kag ila man nga hingyuon sa Inter-Agency Task Force nga pahanugutan ang online betting agud nga makabawi ang cockpit operators matapos nga ginlimitahan lamang sa apat ka tawo per entry ang mahimo nga makasulod sa bulangan.
Ginpaboran sang United Gamefowl Breeders Association of Panay ang pagpahanugot sa online betting.
Sa interview sang Bombo Radyo kay Engr. Alex Bocol sang nasambit nga asosasyon, iya ginpahayag nga ang pagpahanugot sa online betting kag sa telecast ang makabulig agud nga malimitahan ang paglapta sang COVID-19.
Sa pagpaathag ni Bocol, sa baylo nga magpadulong sa bulangan, ang gamefowl enthusiasts ang mahimo na lang nga makapusta kag maka-monitor sa ila balay gamit ang gadgets.
