ILOILO CITY – Nabreak sang flagship station sang Bombo Radyo Philippines ang kaugalingon nga record sa Dugong Bombo.
Matandaan nga sang nagligad nga tuig, 998 ang mga successful blood donors sa Dugong Bombo 2019.
Sa subong nagdangat na sa 1, 200 ang successful blood donors sa nga bunga sang partnership sa mga Local Government Units.
Nahibaluan nga subong nga adlaw, nangin madinalag-on ang ginpatigayon nga Dugong Bombo in Partnership with Ugyon Para sa Passinhon: Dugo Mo, Kabuhi sang Passi City.
Ini ang ginpatigayon sa Passi City Arena sa Passi City.
Sa exclusive interview sang Bombo Radyo kay Passi City Mayor Stephen Palmares, iya ginpahayag nga ang nasambit nga blood letting ang bunga sang pagbuligay sang Bombo Radyo Iloilo kaupod ang local government unit sang syudad kag Philippine Red Cross.
Suno kay Palmares, tuman kainit ang pagsuporta kag pagbuylog sang mga pumuluyo sa blood letting activity.
Ini ang ginapatigayon suno sa alkalde kada bulan kag tuman ang iya kalipay bangud sa pihak sang COVID-19 pandemic, madamo sa gihapon sang nagadonar sang dugo.
Gin-athag man ni Palmares nga wala man ginakalipatan ang pagsunod sa health protocol sa lugar kaangay sang pagsuksok sang face mask, social distancing, kag disenfection.
Nahibaluan nga magluwas subong nga adlaw, may patigayunon pa nga madason nga hugnat sang Dugong Bombo sa Byernes, Nobyembre 27.
