ILOILO CITY- Nagpasalig ang Iloilo Provincial Government nga maumpisahan na sa pinakamadali nga tion ang proseso sang pag-acquire sang probinsya sang COVID-19 vaccine.
Sa interview sang Bombo Radyo kay Iloilo Governor Arthur Defensor Jr., iya ginpahayag nga sa subong, yara pa lang ang probinsya sa lebel nga nagapakig-istorya ini sa mga kompaniya angot sa kon ano nga brand sang bakuna ang i-procure sang probinsya.
Suno kay Defensor, preparado na ang budget, ang cold storage para sa bakuna kag mangin ang kapasidad sang mga district hospitals.
May kaangtanan naman sa partnership sang provincial government kag sa mga private companies nga posible magsabat sang balayran sang pagpabakuna sang ila mga empleyado kaangay sang nangin commitment sang Florete Group of Companies, ginpahayag sang opisyal nga wala pa sang may naghatag sang commitment kag padayon pa ang ila pagconsolidate.
Nagpabutyag naman ang natungdan sang iya kahandaan nga magpatublok sang bakuna sa kondisyon nga strategic ini,napamatud-an nga safe kag maayo ang record.
Gin-athag naman niya nga ang bakuna ang back-up ukon suporta gid lamang bangod ang direksyon sang probinsya amo nga mapanubo gid ang kaso sang COVID-19.
