Nagapanguna ang probinsya sang Iloilo sa may pinakamataas nga measles-rubella immunization coverage sa Western Visayas.
Sa interview sang Bombo Radyo kay Iloilo Provincial Health Officer Dr. Ma. Socorro Quiñon, iya ginpahayag nga may mga banwa na sa probinsya nga nakalapaw sa 100%.
Base sa February 1-15 nga data sang Iloilo Provincial Health Office, ang may nagapanguna nga accomplishment sa measles-rubella kag oral polio vaccination amo ang Lemery nga may 109.56%.
Ginasundan ini sang Dueñas nga may 107.23%.
Naglapaw man sa 95% ang Passi City, Lambunao, Dingle, San Dionisio, Carles, kag Batad.
Suno kay Quiñon, nangin maayo ang partisipasyon sang mga ginikanan bangud gindala gid nila sa vaccination posts ang mga kabataan.
Ginpasalamatan man ang mga health workers nga nagapadulong bisan sa nabaw-ing nga mga lugar agud mabakunahan ang mga bata.
Sa bilog nga Western Visayas, santo sa record sang Department of Health, yara na sa 60 percent sang target children population ang nabakunahan batok sa measles-rubella kag polio.
Ang Iloilo ang nagapanguna nga may 74.96 percent.
Ginasundan ini sang Guimaras province nga may 72 percent, Capiz nga may 58.75%, Negros Occidental nga may 57.54%, Antique nga may 54.5%, Bacolod City nga may 51.6%, Aklan nga may 49.25%, kag Iloilo City nga may 47.6%.
