Indi lamang mga tawo ang apektado sang tuman ka init nga tyempo dala sang Super El Niño kundi ang halos tanan nga mga kasapatan lakip na ang mga ido kag kuring.
Sa interview sang Bombo Radyo kay Dr. Darel Tabuada, Iloilo Provincial Veterinarian, iya ginpahayag nga mas sobra pa ang ginabatyag sang mga kasapatan kun masingkal ang init sang panahon bangud limitado lang ang mga sweat glands sini.
Suno sa iya, indi tupong sa tawo ang pamaagi sang pag-cool down sang kalawasan sang sapat rason nga mas madasig sila dakpon sang heat stroke.
Ginpaathag man ni Tabuada nga indi lang ang mga hinuptanan ang apektado kundi pati man ang poultry kag livestock.
Nagpanugyan naman ini para sa mga nagasagod sang baka, karbaw, kag kanding, nga indi nila pagpaharabon ang ila kasapatan sang alas nuebe sa aga tubtob alas tres sa hapon bangud amo ini ang tiyempo nagapugati ang init.
Ang mga nasambit nga mga sapat amo ginatawag nga ruminant ukon ang mga sapat nga nagakaon sang hilamon ang mas delikado ang kahimtangan bangud kinahanglan nila nga ma-expose sa idalom sang init.
Nagpaandam man si Tabuada nga posible magnubo ang produksiyon sa poultry kag livestock bangud wala sang gana magkaon ang mga kasapatan bangud sa mainit nga tiyempo kag posible nga mag-untat ang ila nga pagdaku.
Sa mga manok, ginalantaw nga posible gagmay ang ila pagwaon nga mga itlog.
Ginpanugyan sini nga siguruhon nga may tubig ang mga hinuptanan, may maayo nga ventilation, kag limitahan ang exposure sa init.
