47 anyos nga lalaki, ginbuno-patay sang 37 anyos babaye sa Buenavista, Guimaras

Nagapangatubang sang kaso nga Homicide ang isa ka babaye matapos ginbuno tubtob mapatay ang isa ka lalaki sa Barangay Avila, Buenavista, Guimaras.

Ang biktima amo si Alias Toto, 47, samtang ang suspek naman amo si Alias Inday, 37, lunsay residente sang nasambit nga lugar.

Sa interview sang Bombo Radyo kay Pol. Col. Pablito Asmod Jr., director sang Guimaras Police Provincial Office (GPPO), iya ginpahayag nga nagsulong sa balay ni alias Inday ang biktima nga si Alias Toto kag may natabo nga kumprontasyon.

Ginapahayag nga may daan na nga hiligut-anon sa tunga sang suspek kag biktima

Suno kay Asmod, ginlampusan ni Alias Toto sang kahoy si Alias Inday.

Wala man nakapugong si Alias Inday rason nga nagkuha man sang kutsilyo kag ginbuno ang biktima.

Patal nga mga pilas sa nawong kag likod ang naangkon ni Alias Toto nga nangin rason sang iya kamatayon.

Ginapahayag nga pakaisa man lang ni Alias Toto ang bana sang suspek.

Sa subong, preso na si Alias Inday sa Buenavista Municipal Police station.