ILOILO CITY – P14.4 million ang budget sang Iloilo City Government para sa 13 ka units sang 4×2 Mistubishi Strada pick-up trucks nga gin-procure para sa 12 ka mga konsehal kag isa para sa Sangguniang Kabataan (SK) Federation.
Sa interview sang Bombo Radyo kay Joren Sartorio, pinuno sang General Services Office (GSO), iya ginpahayag nga naghalin sa Capital Outlay Fund sa idalom sang Iloilo City Mayor’s Office ang pondo para sa sini nga mga salakyan.
Suno kay Sartorio, Enero pa lang sang gin-umpisahan ang procurement kag Marso 29 sang opisyal nga gin-deliver.
Ginpahayag man sang natungdan nga antes pa man nagpungko si Iloilo City Mayor Jerry Treñas bilang alkalde sang syudad, may mga hingyo na nga daan nga mag-provide sang government-issued vehicles para sa mga opisina sang konsehal para sa ila tagsa ka mga proyekto.
Suno kay Sartorio, may yara man sang pondo para sa MOOE ukon Maintenance and Other Operating Expenses ang tagsa ka opisina kag diri na kuhapm ang para sa sweldo sa driver, gatong, kag maintenance.
May kaangtanan naman sa mga pick-up trucks nga wala ginbaton sang iban nga mga konsehal, mahimo ini itugyan sa iban nga mga opisina sa Iloilo City Government.
Una nga gintumod amo ang City Social Welfare and Development Office (CSWDO) bangud isa lang ang ila salakyan nga ginagamit.
Sa interview sang Bombo Radyo kay Sartorio, iya ginpahayag nga magamit ini sang CSWDO sa pagdeliver sang food and non-food items kun may mga biktima sang kalamidad, sunog, kag iban pa.
Gin-athag man ni Sartorio nga kun mag-resign ukon matapos na ang termino sang konsehal, ibalik ang salakyan sa Iloilo City Government.
