Sin-o bala ang indi makibot kun i-donar lang sang isa ka tawo ang kwarta nga ginsupot niya sa iya halos bug-os nga kabuhi?
Ini man ang nabatyagan ni Mayor Katsuaki Kamiji sang Yokosuka sa Japan matapos nabaton halin sa wala nagpakilala nga tigulang ang 60 million yen ukon kapin P26.4 million nga cash.
Ginapahayag nga personal nga nagpadulong sa city hall ang lalaki nga ginabanta nagaedad 70 tubtob 80 anyos kag ginhingyo nga ihatag sa alkalde ang backpack nga may unod nga sulat.
Sa sulat, nakasaad nga idonar niya ang kwarta nga naglab-ot 60 million yen. Ginsupot niya ang amo nga kwarta halin sang Grade One pa lang siya.
Nagpamalibad ang lalaki nga magpakilala.
Indi naman makapati kag natandog gid ang balatyagon sang alkalde bangud sang nabaton nga donasyon ilabi na sa tion sang pandemya.
Santo sa report, indi bag-o sa Japan ang amo sini ka dalagku nga donasyon.
Sang nagligad nga tuig, isa ka lalaki ang nagpadulong man sa city hall sa Nara kag nagbilin sang bag nga may unod nga cash nga 30 million agud nga ibulig man sa edukasyon kag sa mga pigado.
Sang nagligad man nga tuig, may wala man nagpakilala nga tawo nga nagdonar sang five million yen in cash sa isa ka ospital sa Kobe.
