ILOILO CITY – Patas lang nga ayuda ang gina-ayo sang isa ka ordinaryo nga driver sang traditional nga jeep agud mabuhi man ang iya nga pamilya sa tunga sang pandemya.

Sa interview sang Bombo Radyo kay Ruben Manzano nga nagamaneho sang Jaro CPU nga jeep, iya ginpahayag nga tuman gid ka pierde ang ila income subong ilabi na nga may Libre Sakay nga ginatanyag ang modernized jeepneys.

Maayo na suno sa iya kun makabitbit siya pauli sang P100 tubtob P200 bangud wala naman siya nagapaabot pa sang daku nga kwarta kada adlaw.

“Sa bilog mo nga adlaw nga byahe, indi ka na mag-asa sang daku nga kita. Isa ka gatos, duha ka gatos nga madala mo pauli… pero subong nga panahon, ano ang mabakal mo sa duha ka gatos? Kun pigado na gid, ibakal sang bugas kag lugawon, eh. Wala ka na gid sini sang mahimo. Antos ka na lang sini, sangsa magutuman ka da,” pahayag ni Manzano.

Suno pa sa iya, kun indi sila miyembro sang kooperatiba, indi pa sila makadali-dali sa pagbaton sang ayuda halin sa Land Transportation Franchising and Regulatory Board (LTFRB).

“May ginahatag man sila nga ayuda pero indi palarehas sa tanan. Subong may ara man sang service contracting program, pero madamo pa nga proseso antes namon ma-avail ina. Kami nga wala sa kooperatiba, wala kami ginahatagan. Kun ara ka sa cooperative, hatagan ka nila. Amo na ang malisod sa tanan,” dugang pa sang natungdan.

Sa Libre Sakay sang modernized jeepneys nga ginabayaran sang LTFRB sa idalom sang service contracting program, ‘wala naman sang mahimo’ ang mga driver sang traditional nga jeep suno kay Manzano. “P90 lang gid amon nga koleksyon pakadto-pakari kay ang pasahero abi nagahulat man sang libre kay gapangunyadi man. Wala na ta sang mahimo dira kay indi ta man sila mapilit kay sila gapamuraot man kag gapangunyadi sang ila nga sentimos.”

Magluwas sa driver sang traditional nga jeep, nagawangal man ang ma taxi drivers bangud sa pigado nga income. Una naman nga ginkumpirma sang Association of Taxi Operators in Panay (ATOP) nga nagsulat sila sa Department of Transportation (DOTr) agud tugutan man ang mga driver sang taxi nga maka-avail sang Service Contracting Program. #