ILOILO CITY- Nagdepensa si Iloilo City Mayor Jerry Treñas may kaangtanan sa kapaslawan sini nga magkonsulta sa Department of the Interior and Local Government sa pagpahalog sang protocol sa syudad apisar napaidalom ini sa Modified Enhanced Community Quarantine status.
Sa interview sang Bombo Radyo kay Mayor Treñas, iya ginpahayag nga ginatinguhaan niya nga mabalanse ang ikaayong lawas sang pumuluyo kag ang ekonomiya sang syudad.
Suno sa alkalde, madamo na gid sang ginagutom kag nadulaan sang palangabuhian gani gintugutan niya ang pagbukas sang non-essential establishments.
Pahayag sang opisyal, sa sulod sang tatlo ka semana nga napaidalom sa MECQ ang syudad, nagahatag man sang assistance ang Iloilo City Government sa mga pumuluyo apang indi gid ini bastante.
Ginhalimbawa naman sang alkalde ang Davao City kon sa diin gin-abrehan man ni Mayor Sara Duterte- Carpio ang iban nga mga negosyo apisar nakapaidalom man sa MECQ ang nasambit nga syudad agud mabuhi ang ekonomiya.
Gin-athag naman sang natungdan nga kon ipasirado liwat sang DILG ang mga non-essential establishments, tumanon man niya ini.
Matandaan nga ginpahayag ni Atty. Cedric Jaranilla, legal officer sang DILG Region 6, nga wala sila sang nabaton nga sulat halin kay Treñas nga pagabuksan ang mga non-essential establishment apisar ginadumilian ini sa Omnibus Guidelines sa pagpatuman sang Community Quarantine sa Pilipinas.
Samtang, may ginapaabot naman nga masobra sa 30,000 doses sang COVID-19 vaccines ang Iloilo City.
Suno kay Mayor Trenas, santo sa ginpromisa ni Vaccine czar Sec. Carlito Galvez Jr., 20,000 doses ang iya sang Sinovac kag 11,700 doses naman ang iya sang Pfizer.
Ginpahayag sang alkalde nga ginaplanuhan na subong ang pagpadasig sang vaccine roll-out sa syudad.
Nahibaluan nga may yara na sang apat ka vaccination centers ang syudad sang Iloilo nga ginalakipan sang Iloilo Convention Center, Central Philippine University, Ateneo de Iloilo kag University of San Agustin.
