Pulis nga nagtuyo magpalagyo sang gin-aresto bangud sa iligal nga bulang sa Oton, Iloilo, pasakaan na sang kaso

Ipasaka na subong nga adlaw, Hulyo 12, ang kaso nga Illegal Gambling batok sa lima ka persona lakip na ang isa ka pulis nga nadakpan nga iligal nga nagbulang sa isa ka subdivision sa Brgy. Cagbang, Oton, Iloilo.

Sa interview sang Bombo Radyo kay Police Captain Robert Jayson Pancha, hepe sang Oton Municipal Police Station, iya ginpahayag nga detained sa gihapon sa estasyon ang lima. Ini amo sanday:

– Police Corporal Virgilio Rojo, 37, residente sang amo nga barangay, kag assigned sa General Services Office (GSO) sang Iloilo City Police Office (ICPO)

– Isaac Villavicencio, 51, residente sang Barangay Cagbang, Oton

– Efren Joan Samillano, 35, residente sang Barangay Mohon, Arevalo, Iloilo City

– Arman Dejapa, 43, residente sang Brgy. Calaparan, Arevalo

– Mark Crucero, 38, residente sang Brgy. San Isidro, Jaro, Iloilo City.

Suno kay Pancha, sang ginbasahan sang Miranda Doctrine ang mga arestado sang nagligad nga Sabado, naghingagaw pa palagyo ang pulis kag nag-agi sa talamnan.

Wala naman ini nakalusot bangud may mga pulis nga nagabantay sa exit point.

Nagapanindugan si Pancha nga wala sang paboran sa ila nga operasyon — pulis man ukon indi.