Nagpanindugan ang Iloilo City Traffic and Transportation Management Office (ICTTMO) nga wala sang kamatuoran ang alegasyon sang isa ka concerned citizen kaangot sa hitabo sa Barangay Balabago, Jaro, Iloilo City nga halos 15 minutos nga naghulat ang mga motorista agud mapalabay ang duha ka van kaupod ang traffic personnel nga nagasakay sa motor.
Sa interview sang Bombo Radyo kay Ret. PCol. Uldarico Garbanzos, head sang opisina, iya ginpahayag nga wala nagasanto ang gin-post sang tagreklamo sa aktuwal nga sitwasyon bangud ginakonsiderar ang mga configuration sang dalan kag ang mga ongoing road modernization project sang Department of Public Works and Highways (DPWH).
Iya man ginpaathag nga may mga special intersections kung sa diin nagalabay ang mga dalagku nga mga salakyan lakip na ang mga truck nga nagakinahanglan sang konsiderasyon para magtabok kag makaliko sa dalan.
Dugang pa niya nga ginahatagan sang mas malawig nga green light ang mga inbound traffic samtang ginaprioridad naman ang mga outbound traffic sa hapon.
Sa pihak nga bahin, gin-ako ni Garbanzos ang pagpalabay sang VIP convoy sang lloilo City Government bangud sang request nga ginahatagan sang prayoridad sa koordinasyon nila sa opisina ni Iloilo City Mayor Raisa Treñas.
Samtang, iya man ginapahanumdom nga maghalong sa mangin komento nga may kinahanglan may kaangtanan sa insakto nga sitwasyon nga nagakalatabo sa lugar.
Suno kay Garbanzos, gina-encourage ang publiko nga magpadayon lang sa paghatag sang feedback agud mamonitor ang mga kakulangan nga makapamaayo sang syudad.
