ILOILO CITY – Nagapati ang pamilya Bolante nga ginpaako lang kay Police Corporal Rodante Lopez, operatiba sang Iloilo City Police Station (ICPS) 1 – Station Drug Enforcement Team, ang pagluthang-patay kay Karl Dannielle Bolante sang ginpatigayon sang mga pulis ang drug buy bust operation sang Hunyo 29 sa North Baluarte, Molo, Iloilo City.
Sa interview sang Bombo Radyo sa iloy nga si Barangay Kagawad Amalia Bolante, iya ginpahayag nga mabaskog ang iya panagupnop nga lain ang nakaluthang sa iya 27 anyos nga anak sang natabo ang operasyon sang amo nga gab-i.
Ginahangkat sang iloy si Lopez nga isugid na kun ano ang matuod nga natabo kag indi na pagdugang-dugangan ang istorya.
Masakit suno kay Bolante kun sa ila himata matabo ang amo nga sitwasyon.
Matandaan nga mismo si Lopez ang nagpasa sang affidavit sa Philippine National Police (PNP) – Regional Internal Affairs Service (RIAS) VI nga siya ang nakatiro sa biktima matapos nga ginapahayag naghana ini nga maghaboy sang granada.
Gina-uyatan naman subong sang pamilya ang medico legal result nga igo sang bala sa likod ang gintunaan sang kamatayon sang biktima.
Negatibo man ang resulta sang paraffin test.
