ILOILO CITY- Nagpangayo sang paghangop si AAMBIS -OWA Partylist Representative Sharon Garin angot sa delayed nga pagrelease sang sweldo sang mga benepisyaryo sang Tulong Panghanapbuhay sa Ating Disadvantaged/Displaced Workers (TUPAD) Program sang Department of Labor and Employment (DOLE).
Sa interview sang Bombo Radyo kay Rep. Garin, iya ginpahayag nga may mga banwa partikular na sa segundo distrito sa probinsya sang Iloilo nga naulihi sa pagpasa sang ila mga dokumento rason nga na- delay man ang pagrelease sang ila sweldo.
Suno kay Garin, madugay gid man ang pagproseso sang TUPAD kag nagalawig sang binulan apang mas nagdugay pa gid ini matapos nga nagpositibo sa COVID-19 ang pila ka mga personnel sang DOLE Region 6 gani naapektuhan man ang ila trabaho.
Gin-athag naman sang mamalidha nga wala nagahalin sa AAMBIS- OWA ang pondo kundi sa regular funding sang DOLE kag naga-facilitate lang ang nasambit nga partylist.
Nahibaluan nga sa idalom sang TUPAD program, ang mga benepisyaryo ang ginpatrabaho sang 10 ka-adlaw nga may P395 nga sweldo kada adlaw ukon P3950 sa pangkabilugan.
Ang DOLE mismo ang naga-release sang sweldo sang mga benepisyaryo via pera padala centers.
