Ginpamatud-an sang mga atleta nga nagtiglawas sang Pilipinas sa Tokyo 2020 Olympics nga ‘they can be the best, and beat the best.’
Sa exclusive interview sang Bombo Radyo kay Mariano ‘Nonong’ Araneta, Jr., chef de mission sang Philippine delagation sa Olympics, iya ginpahayag nga tuman siya ka proud sa sakripisyo kag kadalag-an nga gindala sang Pinoy atheletes para sa Pilipinas sa diin nangin maragtason ini nga Olympiada matapos nakuha sang pungsod ang bulawan nga medalya matapos ang pila ka dekada.
Suno kay Araneta, sa 97 ka athlete, 19 ang na-qualify sa Olimpyada sa diin apat gid ka medalya ang na-secure sang pungsod.
Pangabay sang chef de mission, kuntani magserbe ini nga inspirasyon sa iban man nga aspiring athletes nga nagahandom man nga makahampang sa Olympics.
Ang sekreto lamang suno sa iya agud maka-secure sa liwat sang gold medal ang pungsod, amo ang pag-train sang maayo sa isa ka atleta kaangay ni Hidilyn Diaz, nga may yara sang psychologist, dietician kag coaches.
Sa pihak sini, gindayaw man niya ang kooperasyon sang Philippine Sports Commission kag Philippine Olympic Committee sa pag-assist sa tanan nga kinahanglanon sang Pinoy athletes.
Pahayag niya, nangin ‘the best’ ang eksperyensya sa Olimpyada bangud sa paghugpong sang bug-os nga Philippine delagation.
Sa pagtakop sang Tokyo 2020 Olympics, magaupod man sa marching ceremony ang boxing delegation sang Pilipinas sa diin ang mangin flag bearer amo si Pinay boxer silver medalist Nesthy Petecio.
