Manug-isa na ka bulan ang Enhanced Community Quarantine (ECQ) sa Iloilo City apang wala pa gihapon nakabaton sang ginpasalig nga cash aid ang mga pumuluyo sang kadam-an nga mga barangay sa syudad.
Hulyo 16 sang ginpatuman ang ECQ sa Iloilo City.
Hulyo 30 sang 100% nga na-transfer na sang Department of Social Welfare and Development (DSWD) Region VI sa Iloilo City kag sa tanan nga local government units sa probinsya sang Iloilo ang cash assistance nga amo ang ihatag sa mga apektado sang ECQ.
Ang total amount ang nagalab-ot sa P2.6 billion kag P461,744,000 diri ang nakapain para sa Iloilo City.
Una na nga ginpahayag sang DSWD Region VI nga kinahanglan ipanagtag sang LGUs ang kwarta sa sulod sang 15 ka adlaw halin sang adlaw nga na-download na ang pondo.
Apang sang gin-check sang Bombo Radyo, sa distrito sang Jaro kag Lapaz, tag-duha pa lang ka barangay ang nakaumpisa sa payout.
Sa 42 ka mga barangay sa distrito sang Jaro, ang nakapanagtag pa lang sang cash aid amo ang Barangay Arguelles kag Barangay Cuartero.
Sa duha ka nasambit nga barangay, wala pa naubos hatag ang kwarta bangud may second batch pa nga kinahanglan kumpletuhon.
Sa 25 ka barangay sa Lapaz, duha man ka barangay ang naka-release sang ayuda: Barangay Luna kag Barangay Aguinaldo.
ANO ANG RASON KUN NGAA WALA PA NA-RELEASE?
Sa barangay Dungon A, Jaro, ginpahayag ni Punong Barangay Sonny Catalan nga nakapasa na sila sang ngalan sang mga benepisyaryo kag ginahulat na lang ang schedule nga ihatag sang Iloilo City Government.
Sa Lapaz, ginpahayag ni ABC President Marjorie De Asis Gregorios nga padayon pa ang ila nga pagpanglista sang pangalan sang mga benepisyaryo.
Barangay Luna kag Aguinaldo ang nakapay-out apang ‘maga-sunod sunod’ naman ini suno sa natungdan bangud ready naman ang listahan kag i-sumite naman sa DSWD.
‘Gina-amat amat lang’ suno kay Gregorios kag wala man sang dapat kabalak-an bangud ‘tanan-tanan maka-avail man’ sang kwarta. ##
