Nagpromisa si Presidente Rodrigo Duterte nga pondohan ang mga miyembro sang Partido Demokratiko Pilipino-Lakas ng Bayan (PDP-Laban) nga magapadalagan sa 2022 elections.
Si Duterte amo ang chairman sang isa ka faction sang amo nga ruling party.
Ginpahayag sini nga bisan wala man siya masami nga nagatambong sang ila nga political meetings, pat-od nga iga-kampanya niya ang iya nga ka-partido para sa general elections.
Pahayag pa ni Duterte, suportahan niya ang kampanya sang PDP-laban aspirants kag mahatag man siya sang isa ka sako nga kwarta agud masigurado lang nga madaog ang kandidato.
Indi maathag kun seryoso si Duterte ukon nalakip man ini sa iya “jokes” nga amo naman ang depensahan sang iya Gabinete.
Una diri, nagkumpirma na ini nga maga-retiro na siya sa pulitika. Ang PDP-Laban Cusi faction naman ang ulihi nga nag-appoint kay Senator Ronald “Bato” dela Rosa bilang standard-bearer sa 2022 elections.
