Nagsaka ang tensyon sa pungsod Iraq matapos gintuyo nga patyon si Prime Minister Mustafa Al-Kadhimi.
Gin-target sang missile kag drone attacks ang mismo balay sang prime minister sa Baghdad, apang nakaluwas ini kag yara subong sa maayo nga kondisyon.
Pito sa iya nga mga security guards ang reported nga napilasan sa amo nga assassination attempt.
Ginkondenar naman sang US State Department ang ginpahayag akto sang terorismo. Wala pa sang nag-ako kun sin-o ang may kahimuan sa amo nga pagpang-atake.
Nahibaluan nga duha ka adlaw antes ang insidente, may yara man sang natabo nga masingki nga engkwentro sa Baghdad sa tunga sang pwersa sang gobyerno kag sang supporters sang political parties nga suportado sang Iran.
Kalabanan sa amo nga grupo ang may yara sang armed wings, kag napierde kag nawad-an sang pwesto sa parliament matapos ang general election sang Oktubre 10.
Si Prime Minister Al-Kadhimi ang naka-serbe man anay bilang intelligence chief. Ginakonsiderar siya sang Iran-backed militias bilang suod sa Estados Unidos.
