ILOILO CITY- Nagpasalig ang bag-o nga director sang Iloilo Police Provincial Office nga isa sa mangin prayoridad niya ang pag-uyat sang Claire Diergos Murder Case.
Sa interview sang Bombo Radyo kay PCol Adrian Acollador, bag-o nga director sang IPPO tal-os kay PCol Gilbert Gorero, iya ginpahayag nga ipakita niya nga sinsero ang PNP sa pag-uyat sang kasubong nga kaso ilabi pa nga napasakaan na sang kaso nga murder ang mga suspek.
Suno kay Acollador, padayunon man niya ang away batok sa kriminalidad, iligal nga druga, kag insurhensya.
Tutukan man niya ang paghatag sang seguridad sa probinsya ilabi na nga nag-umpisa na ang election period.
Nahibaluan nga si Acollador ang isa ka Ilonggo bangud ang amay sini ang tumandok sang Badiangan kag ang iloy sini ang tumandok sang Passi City.
Antes nagbulos bilang IPPO Director, si Acollador ang Chief sang Regional Operations Division (R3) sang PRO-6.
