Nag-abot na sa Poland ang tropa sang militar nga amo ang gin-deploy ni US President Joe Biden agud nga pabaskugon ang pwersa kag depensa sang ila nga mga kaalyado nga pungsod kasunod sang pagbutang man sang Russia sang pwersa sang militar sa border sang Ukraine.
Nakit-an ang C17 aircraft kasunod sang eroplano nga ginsakyan naman sang commanding general sang 82nd Airborne Division nga si US Army Major General Christopher Donahue.
May pila pa gid ka eroplano nga amo ang ginapahayag nagdala sang US military equipment kag “advance group.”
Suno naman sa Polish Defense Ministry, ini ang una nga grupo sang American soldiers halin sa isa ka “elite unit” kag natalana nga mag-operate sa southeastern nga bahin sang pungsod.
Matandaan nga 3,000 ka American troops ang ginpa-deploy ni Biden sa Eastern Europe. Ang iban ang iga-deploy sa Germany kag Romania.
Katuyuan sini nga ma-proteheran sang Estados Unidos ang ila kaalyado sa North Atlantic Treaty Organization (NATO) batok sa anuman nga sahi sang kalakasan nga himuon sang Russia.
Ginapahayag nga strong signal ini sang US para kay Russian President Vladimir Putin nga handa ang Estados Unidos nga proteheran ang ila nga mga kaalyado. ##
