Gina-antisipar na sang West nga posible may atubangon nga katalagman sa masunod nga mga inadlaw kasunod sang pag-umpisa sang Russia sang military exercises sa pungsod Belarus kag sa Black Sea nga kasunod pa gid sang ila nga military build-up sa border sang Ukraine.
10 ka adlaw ang military exercises nga ipatigayon sang Russia, kag ginapatihan 3,000 ka mga tropa ang ila nga ginpadala — ang biggest Russian deployment halin sang natabo ang Cold War.
Magluwas pa ini sa 100,000 ka Russian troops nga nagapabilin sa border sang Ukraine.
Suno kay British Prime Minister Boris Johnson, ini na ang posible pinakadaku nga security crisis sa Europa sa sulod sang pila ka dekada.
Nagapati si Johnson nga wala pa sang desisyon ang Russia sa pagpang-atake, apang wala man ini nagakahulugan suno sa iya nga wala sang may matabo nga katalagman sa labing-madali nga tion.
Ginakabalak-an man bangud nagasaka pa ang numero sang tropa nga ginapadala sang Russia, kag nagakahulugan ini nga naganubo naman ang warning time para sa posible nga pagpang-atake.
Una na nga ginpanindugan sang Russia wala sang kamatuoran ang akusasyon sang West nga may plano ini nga sakupon ang former Soviet neighbour nga amo ang pungsod Ukraine, apang posible suno sa Moscow nga magpatigayon ini sang ‘military-technical’ action kun indi pagtumanon ang ila nga demand.
