Bug-os ang suporta sang Philippine Pediatric Society – Western Visayas Chapter sa patigayunon nga Covid-19 vaccination sa mga bata edad 5-11 anyos.
Sa syudad sang Iloilo, maga-umpisa ini sa Lunes, Pebrero 14.
Sa interview sang Bombo Radyo kay Dr. Teresa Martires Hallegado, presidente sang amo nga grupo, ginpaathag sini nga Pfizer vaccine lang ang gamiton sa pagbakuna sa mga bata bangud ini lang ang naka-secure sang emergency use approval nagikan sa Philippine Food and Drug Administration (FDA).
Mas matahaw ini ukon may lower dosage kag lower concentration ipaanggid sa mga ginahatag nga dose sa mga naga-edad 12-17 anyos.
Gin-reformulate ini suno sa doktor agud nga masarangan sang lawas sang bata sa age group nga 5-11.
Suno kay Hallegado, indi man dapat pagkabalak-an kun may matabo nga adverse events kasunod sang pagbakuna bangud wala sang na-rekord nga severe adverse reactions base sa pediatric vaccination sa iban nga pungsod kag mangin sa National Capital Region (NCR).
Gamay lang nga sakit sa injection site ang mabatyagan suno kay Hallegado.
Ginpaathag man sang doktor nga importante ang inoculation sa sini nga age group bangud may risgo nga malatnan sila sang severe illness sang Covid-19. Ang Multisystem Inflammatory Syndrome in Children (MIS-C) ang masami man nga ma-detect sa sini nga edad.
Panugyan ni Hallegado sa mga ginikanan, saligan ang pagtuon sang mga eksperto sa bakuna bangud bisan bag-o lang ang Covid-19 vaccine, nag-agi ini sa husto kag maid-id nga proseso.
Antes pabakunahan ang mga bata, dapat anay nga may i-secure nga parent’s consent bangud isa ini ka absolute requirement bangud indi man mandatory ang Covid-19 vaccination.
