Nag-abiso naman ang Foreign Office sang United Kingdom sa tanan nga British citizens nga yara pa sa Ukraine nga magbiya na sa amo nga pungsod samtang may salakyan pa nga available.
Ang advisory ang gin-isyu bangud sang padayon nga pagtaas sang kahangawa nga malapit na lang sakupon sang Russia ang Ukraine.
Antes ang advisory halin sa UK, nauna na si US President Joe Biden sa pagpanawagan sa US citizens sa Ukraine nga maghimos na kag magbiya sa amo nga lugar.
Gin-anunsyo man sang US President nga may yara sang emergency military plans nga pasakyon sa eroplano ang Americans nga nagpalagyo halin sa Ukraine padulong sa Poland.
Ini agud nga malikawan ang kapalpakan sa evacuation kaangay sang natabo sa Kabul sa Afghanistan sang nagligad nga tuig.
Sa bahin sang UK, ginpahayag sang foreign office nga wala sang may gina-plano nga emergency airlift bangud madamo pa sang commercial flights nga naga-operate sa land border sa Poland.
