Bangud sa paglaum nga makaangkon sang anak nga lalaki, nagpasugot ang isa ka nagabusong nga babayi sa Pakistan nga magpalansang sa iya nga ulo.
Natabo ini sa Peshawar, ang capital kag pinakadaku nga syudad sa probinsya sang Khyber Pakhtunkhwa sa Pakistan.
Sandig sa report, nagdali-dali ang babayi nga magpangayo sang bulig sa ospital matapos sini gintilawan nga gabuton ang 5 sentimetros ukon duha ka inches nga kalabaaon sang lansang. Gingamit sini ang pliers.
Una nga gin-alegar sang babayi nga siya ang naglansang sa iya nga ulo, apang sang ulihi, gin-ako sini nga ang naglansang sa iya ulo amo mismo ang faith healer nga nagpangako sa iya nga makabun-ag siya sa isa ka lapsag nga lalaki kun magpasugot sa amo nga akto.
Suno kay Dr. Haider Khan, staff member sa Lady Reading Hospital, “fully conscious” ang babayi apang tuman ang kasakit nga iya nabatyagan.
Suno pa sa impormasyon halin sa ospital, may tatlo na ka anak ang amo nga babayi.
Ginapahayag ginpahog siya sang iya bana nga bayaan kun babayi gihapon ang iya igabun-ag nga lapsag. Sa kahadlok sang babayi, nagpalapit ini sa faith healer.
Sa subong gin-imbestigaran na sang mga pulis ang x-ray images sang injury nga nag-appear man online.
Sandig sa tweet ni Peshawar police chief Abbas Ahsan, may special investigative team na nga gintukod agud pasabton ang ginatudlo nga faith healer kag agud mahatagan hustisya ang natabo sa babayi.
Nahibaluan nga sa pigado nga mga nasyon sa South Asia, ang anak nga lalaki ang ginapatihan makadala sang swerte para sa financial security sang mga ginikanan.
Common naman ang faith healers sa pila ka bahin sang Pakistan, ilabi na sa north-western tribal areas. Ang ila practice ang nakasandig sa Sufi lore nga ginalaragway man nga “form of Islamic mysticism.”
Ini nga mga aktibidad ang banned man sa madamo nga mga eskwelahan sang Islam.
22222215 Comments13 SharesLikeCommentShare
