Indi halos mabatyagan sang mga Pilipino sa Moscow, Russia ang Russia-Ukraine tensions apisar nga bilog nga kalibutan na ang nagaistorya sini nga ginamo kag gin-intrahan na sang iban nga dalagku nga mga pungsod.
Suno kay Bombo International Correspondent Ejay Merced direkta sa Moscow, wala pa man sang abiso ang embahada sang Pilipinas sa Russia sa mga Pilipino nga nagatinir sa amo nga pungsod.
Wala man sang naobserbaran nga daw lain nga lebel sang deployment sang mga personnel sang pulis kag militar.
Mabatyagan lang ang gamo “economically” bangud suno sa natungdan, wala na sila ginapasugtan nga mag-transact nga mga remittance centers nga ginapanag-iyahan sang West.
Partikular sini nga gintumod ang Western Union, isa ka American multinational financial services company, nga naka-base sa Russia.
Posible suno kay Merced nga amo sini ang epekto sang gamo kag nagaumpisa na sila subong sa pagpangita sang mga kumpaniya nga sarang maagyan sang ila nga kuwarta bangud ginakahangaw-an nga indi na maka-operate ang American companies sa Moscow.
30 ka tuig na nga naga-operate ang Western Union sa Russia apang sandig sa ginpaguwa nga advisory, untatan sini ang internal money transfers halin sa Abril 1. Magatutok ini sa cross-border business sa tion sang increased competition sa Russian market.
Wala gintumod sang amo nga world’s largest money transfer firm kun may kaangtanan ini sa Russia-Ukraine tensions apang ginpahayag nga ang desisyon ang kasunod sang nagasikat pa gid nga inter-bank transfers nga nagagamit lang sang mobile phone number sa Russia.##
