Nagsaka na sa 58 ang numero sang patay bangud sang tatlo ka oras nga mamunog nga ulan nga nagresulta sa landslides kag lapnagon nga pagbaha sa Rio de Janeiro sa Brazil.
Indi pa maathag subong kun pila ka tawo ang missing sandig sa latest report sang Rio de Janeiro Fire and Civil Defense Department.
Tuman ka baskog ang baha rason nga masobra 200 ka mga tawag ang nabaton sang fire department nga nagapangayo sang tabang.
Makit-an man sa footage nga ginpost sa social media nga nagakalaanod pati ang mga salakyan kag balay.
Sa subong ginapatigayon pa ang rescue mission nga ginapangunahan sang 180 ka mga myembro sang militar.
Ginakahangaw-an nga magasaka pa ang numero sang mga patay. ##
