Wala nagaisol ang Russia kundi labi pa gid gani nga nagaabante!
Ini ang bag-o nga alegasyon sang Estados Unidos kag sang NATO ukon North Atlantic Treaty Organization apisar una na nga nagpahayag ang Russia nga gina-bawi na sini ang ila tropa nga ginpangbutang malapit sa border sang Ukraine.
Sa Ukraine, ginpasaka sang mga tawo ang ila nga hayahay kag ginpatunog ang national anthem agud nga mapakita ang pag-isa sa tunga sang ginakahangaw-an nga Russian invasion.
Ginhimo ini sang Ukraine apisar ginbiktima sang lapnagon nga cyberattack ang websites sang ila nga state banks, defense ministry, kag armed forces — atake nga gintudlo sa Russia, kag atake nga ginpanginwala man sang Russia.
Kun Russian defense ministry naman ang pahambalon, ginpahalin na ang ila nga pwersa sa Ukraine bangud natapos na ang exercises sa southern kag western military districts sa Ukraine.
Sa isa ka ginbalhag nga video, ginpakita ang mga tangke, infantry fighting vehicles, kag self-propelled artillery units nga nagbiya sa Crimean peninsula.
Apang wala diri nagapati ang Estados Unidos. Suno kay US Secretary of State Antony Blinken, nagapalapit pa gid gani ang Russian units sa border, baliskad sa ila pahayag nga nagapalayo na sila.
Suno sa senior Western intelligence official, nagapabilin nga mataas ang risgo sang Russian aggression batok sa Ukraine sa bilog nga bulan sang Pebrero.
Mahimo suno sa opisyal nga mag-atake ang Russia nga wala na sang warning nga himuon.
Suno naman kay NATO Secretary-General Jens Stoltenberg, wala naga-withdraw ang tropa sang Russia gani nga ginakontra lang sang Moscow ang mensahe sang diplomasiya. ##
