Umpisahan na sang Senado subong nga adlaw, Pebrero 24, ang imbestigasyon kaangot sa report sang pagkadula kag ginapahayag pag-kidnap sa kapin 30 ka mga manugbulang ukon cockfight players.
Pangunahan ini sang Senate committee on public order and dangerous drugs.
Gin-imbitar ni Sen. Ronald dela Rosa, chairman sang committee, ang mga opisyal halin sa law enforcement kag state gaming agencies.
Imbitado man ang mga tiglawas sang missing nga mga manugbulang nga gina-alegar ginpwersa nga ginkuha halin sa ila nga mga puluy-an ukon sa mga bulangan. Ginapahayag armado nga mga tawo ang nagkuha sa ila sa duha ka separado nga insidente sa Manila kag sa mga probinsya sang Bulacan, Laguna, kag Rizal sang nagligad nga bulan.
Una na nga gin-rekomendar ni Dela Rosa, nga isa man ka anay PNP chief, nga i-suspinder anay ang online sabong samtang wala pa nasolbar ang amo nga kaso.
Ginrekomendar man sini nga ang prangkisa sang online cockfighting firms ang pauyatan sa Kongreso agud mangin mas istrikto ipaanggid sa Philippine Amusement and Gaming Corp. (PAGCOR).
Sa bahin naman sang PNP, nagpasalig ang ahensya nga maga-trabaho ini kaupod ang National Bureau of Investigation (NBI) agud madasig nga masolbar ang kaso sang missing nga mga manugbulang. ##
