Ginpanindugan sang North Atlantic Treaty Organization (NATO) nga pangapinan sini ang “every inch” sang ila nga teritoryo sa oras nga atakehon sang Russia ang isa ka pungsod nga myembro sang ila nga alyansa.
Suno kay NATO Secretary-General Jens Stoltenberg, ang NATO ang pinakamabaskog nga alyansa sa maragtas sang kalibutan; kag kun tandugon ang isa sa ila nga kaalyado, maga-trigger ini sang response halin sa bilog nga alliance.
Kadungan sang pagkondenar sa ginhimo sang Russia sa Ukraine, nagpaandam man si Stoltenberg nga tuman ka baskog ang ila nga commitment sa Article 5 sang Washington Treaty.
Sandig sa Article 5, ang atake sa isa ka member country ang makabig man nga atake na sa tanan nga mga myembro sang NATO.
Sa bilog nga maragtas sang NATO, makaisa pa lang nga nagamit ang Article 5. Natabo ini sang 2001 kasunod sang al-Qaeda attacks sa Estados Unidos kun sa diin masobra 3,000 ka tawo ang napatay. Sang nagbalos ang US sa Afghanistan, nagpadala man ang NATO sang mission bilang bulig.
Sa subong suno sa NATO-Secretary-General, ginpatigayon anay ang konsultasyon sa idalom sang Article 4.
Ang nag-request sang consultation amo ang member states nga Bulgaria, Czech Republic, Estonia, Latvia, Lithuania, Poland, Romania kag Slovakia.
Sa Article 4 nakasaad nga kun maka-batyag ang isa ka member state sang pamahog halin sa isa ka pungsod ukon terrorist organization, naga-tipon ang 30 member states para sa formal consultations agud nga madesideran kun paano i-counter ang pamahog.
Gin-athag man nga apisar nga may mga myembro ang NATO nga nagasuplay sang armas sa Ukraine, wala man naga-lunsar ang NATO sang military action bangud close partner lang sini ang Ukraine apang indi kabahin sang ila nga alyansa.
