Bangud 1976 pa sang gin-umpisahan tukod ang 620-megawatt nga Bataan Nuclear Power Plant (BNPP) kag matunog subong nga gina-istoryahan ang posible nga revival ukon pagpabangon sa sini nga planta, importante ang pagpatigayon sang assessment kag evaluation agud mahibaluan kun ano pa kapag-on ang mga sistema sini.
Kun basehan ang latest statement sang Department of Science and Technology-Philippine Nuclear Research Institute, ginpahayag nga mapag-on pa ang desinyo sang sini nga planta kag ginalantaw nga safe ini kun gamiton liwat.
Sa interview naman sang Bombo Radyo kay Concepcion, Iloilo Vice Mayor Milliard Villanueva, myembro anay sang plant operations and management group para sa amo nga planta, iya ginbalik-balikan ang ginhimo nga pagtuon sang Korean firm sang 2019 kun sa diin ginpahayag sang amo nga tuig nga magalab-ot sa 1 billion US dollars ang gastuhon kun ipabangon liwat ang BNPP.
Sandig naman sa International Atomic Energy Agency, magalab-ot sa 1.0 billion US dollars tubtub 2.0 billion US dollars ang magamit agud nga mapabalik ini sa husto nga operasyon.
Ang amo nga nuclear facility ang ginapahayag yara pa sa maayo nga kondisyon bangud ang design sini ang kaangay man sa nuclear plants nga ginagamit sang South Korea, Slovenia, kag Brazi nga lunsay man maayo ang kondisyon tubtub subong.
Bisan nga wala man ini nagamit umpisa sang gintukod sang tyempo pa ni anay president Ferdinand Marcos, ginpatuman ang maintenance works.
Suno kay Villanueva, sa iya personal nga assessment, kun ikonsiderar ang nuclear power plant option sa power development plan, dapat anay nga iga-establisar ang requirements kaangay sang regulatory body nga amo ang maga-examine sa planta.
Kinahanglan nga separado ini nga regulatory body sa proponent agud nga indi mapahilabtan ang assessment.
Lakip man dapat sa assessment ang kwalipikasyon kag kasampat sang mga personnel.
Kun ginakonsiderar gid man nga ipabangon ang nuclear facility, nagapati si Villanueva nga tinuig pa ang hulaton antes ini mapatigayon.
