ILOILO CITY- Wala pa sang nagakaigo nga basehan ang pagdeklarar sang state of economic emergency sa Pilipinas sa tunga sang padayon nga pagtimbuok sang presyo sang produktong petrolyo nga tuga sang Russia-Ukraine conflict.
Ini kasunod man sang pagduso ni Albay Rep. Joey Salceda kay Presidente Rodrigo Duterte nga mag-deklarar sang state of economic emergency agud magamit sang local government units (LGUs) ang ila calamity funds agud ma- address ang nagalumapaw nga presyo sang gatong.
Sa interview sang Bombo Radyo kay Dr. Jerry Bionat, head sang Provincial Distaster Risk Reduction and Management Office (PDRRMO), iya ginpahayag nga base sa NDRRMC Memorandum Order # 60-2019, wala nalakip sa criteria ang oil price hike agud makadeklarar sang state of emergency bangud natural kag human -induced disaster lang ang ginabasehan.
Suno kay Bionat, apisar nalakip man ang economic losses kag impact, apang wala na-specify ang may kaangtanan sa presyo sang gatong.
Ginsuhestiyon naman sang PDRRMO head nga mas maayo nga i-revise ang guidelines para sa deklarasyon sang state of emergency agud nga mas maathag ang basehan kag magamit gilayon ang calamity fund.
