Ginkumpirmar sang Australian government nga 15 na ang narekord nga kaso sang Japanese encephalitis kag duha na ang napatay humalin sang nagsugod nga naglapta ang virus sa apat ka estado sa Australia.
Ang mga lugar nga may kaso sang Japanese encephalitis amo ang New South Wales, Victoria kag South Australia.
Ang amo nga outbreak ang ginpreparahan na sang state government pinaagi sa pagbakal sang 130,000 ka doses sang bakuna agud nga maprotektahan ang mga tawo batok sa Japanese encephalitis.
Ang Japanese encephalitis ang isa ka viral brain infection nga amo ang nagalapta pinaagi sa kagat sang lamok.
Ang virus makita sa mga baboy kag pispis nga mapasa sa mga lamok kun ini ang magkagat sa infected nga mga sapat.
Nangin proactive man ang Australian government sa pagresponde sa commonwealth support.
Plano man sang gobyerno nga mas pasangkaron pa gid ang surveillance sang mga lamok kag animal activities ang amo posible halinan sang paglapta sang virus.
Ginatutokan man sang gobyerno ang information kag awareness campaign agud nga mapaintindi sa mga tawo ang ila kinahanglan nga mahibaluan agud nga maprotektahan ang ila kaugalingon.
Suno kay Bombo International Correspondent Denmark Suede,– direkta sa Australia, ginalauman nga magasugod ang pagpangbakuna sa mga residente sa masunod nga duha tutub tatlo ka semana.
Suno kay Suede, ang amo nga virus ang wala nagalapta sa syudad kaangay sa sydney, Australia.
Ini ang nagahalin kag nagalapta sa uma nga bahin sang pungsod nga masami ginatiniran sang mga lamok.
Ginatumod man sang Australian government nga dugang nga problema sang pungsod ang wala untat nga pag-ulan sa diin masami nga nagapundo ang tubig kag ginatiniran sang mga lamok.
Nag-allocate naman ang gobyerno sang $10m ukon masobra sa P100 million bilang suporta sa sa territory agriculture departments sa pagresponde sa virus.
