Epektibo subong nga adlaw, Marso 14, pahanugutan na sang Department of Foreign Affairs (DFA) ang walk-ins para sa overseas Filipino workers kag mga indibidwal nga eligible para sa passport courtesy lane.
Suno sa ahensya, ang mga OFWs nga maka-avail sang walk-in nga serbisyo sa consular offices sang DFA amo lamang ang mga active OFWs ukon ang mga maka-presentar sang ila current kag valid nga employment contract.
Ang bag-o nga pagsulundan sang DFA ang kasunod sang mga reklamo nga may pila ka mga indibidwal nga nagabaligya sang passport appointment slots sa social media, apisar nga LIBRE kuntani ini base sa polisa sang gobyerno.
Sang Martes sang nagligad nga semana, una naman nga nagpahayag si Foreign Affairs Secretary Teodoro Locsin Jr. nga untatan na ang paghatag sang passport appointment slots sa mga recruiter sang OFW.
Kaangay sang iban nga naga-proseso, kinahanglan man nila nga mag-kuha sang slot online.
Sa bahin sang syudad sang Iloilo, duha ka beses na nga nagpadala sang sulat si Iloilo City Mayor Jerry Treñas sa opisina sang DFA nga nagahingyo sa ahensya nga dugangan ang ila nga mga personnel nga naga-cater sa mga passport application kag renewal bangud nga tuman ka dugay ang appointment kag pagkuha sang slot online. ##
