ILOILO CITY- Opisyal na nga gin-endorso sa Partido Reporma si Vice President Leni Robredo para sa pagkapresidente.
Ini kasunod sang pag-resign ni Senator Panfilo Lacson, nga nagapadalagan man sa pagka-presidente, bilang member kag chairman sang Partido Reporma bangud sa desisyon sang partido nga suportahan ang lain nga kandidato nga amo si Robredo.
Suno kay Davao del Norte Representative Pantaleon Alvarez,presidente sang Partido Reporma, kinahanglan nila sang isa ka leader kag para sa 2022 presidential elections, sa tunga sang mga konsiderasyon kag krisis nga kinahanglan malampuwasan, nagakaigo ang isa ka lider nga babaye kag ini amo si Leni Robredo.
Dugang ni Alvarez, sa nabilin nga masobra isa ka bulan kag tunga antes ang eleksyon, ang pinakamaayo nila nga himuon amo ang pagsuporta sa kampanya ni Robredo.
Apisar ginlaragway ni Alvarez si Lacson bilang “the best” kag “the most qualified to be president,” apang ang realidad sa gwa amo ang nagtulod sa ila nga suportahan ang kandidatura ni Robredo.
