ILOILO CITY- Isa ang patay kag duha ang pilason sang nalumpag ang pader sang isa ka puluy-an sa Brgy. Poblacion Ilaya, Passi City.
Ang biktima nga ginbawian sang kabuhi amo si Christian Aguilar, 5 -anyos samtang ang napilasan amo sanday Shaina Mae Panila, 19-anyos kag Joland Sampiano, 23-anyos.
Sa interview sang Bombo Radyo kay Passi City Mayor Atty. Stephen Palmares, iya ginpahayag nga ululupod sa sulod sang balay ang tatlo ka mga biktima sang hinali lang nga nalumpag ang sementado nga pader kag napit-alan gid ang mga ini.
Suno sa alkalde, posible nga naghumok ang duta nga ginatindugan sang pader bangud sa pila ka adlaw na nga pag-ulan.
Naghatag naman sang bulig ang city government para sa haya sang biktima kag pagpabulong sang mga pilason.-
