May na-rekord na nga mga napatay bangud sa Tropical Storm Agaton.
Sa Negros Oriental, ginapahayag tatlo ang patay sa Basay lakip na ang apat ka tuig nga bata nga nalumos sa suba sa Barangay Bongalonan.
Apang ang yara pa lang sa rekord sang National Disaster Risk Reduction and Management Council (NDRRMC) as of press time amo ang isa ka casualty sa Davao de Oro.
Residente sang Monkayo ang napatay.
Sa Leyte, lima ka myembro sang isa ka pamilya ang padayon pa nga ginapangita matapos ang pagtiphag sang duta sa Can-Ipa sa Baybay City.
Samtang, padayon naman ang ginahimo nga monitoring sang mga otoridad sa posible pagluntad sang oil spill matapos naglugdang ang barko sang Jomalia Shipping Lines sa Consuelo Port, Camotes Island, Cebu.
Ang nasambit nga barko ang una nga nagtakingking matapos ginhampak sang mabaskog nga hangin kag balod.
Matapos ang pila ka oras, dalayon na ini nga naglugdang.
Suno sa Philippine Coast Guard, gin-abandon sang 14 ka mga crew members sang vessel antes ini naglugdang.
Ang vessel ang may 5,430 liters sang diesel fuel oil kag 68 liters sang lube oil.
Sa latest record sang NDRRMC, yara na sa 45,000 ka tawo ang apektado bangud sa bagyo.
Ang apektado nga mga rehiyon amo ang Region 10 (Northern Mindanao), Region 11 (Davao Region), CARAGA, kag ang Bangsamoro Autonomous Region in Muslim Mindanao (BARMM).
