ILOILO CITY- Isolated sa gihapon ang tatlo ka mga barangay sa Sara, Iloilo kasunod sang pagbaha bangud sa epekto sang bagyo Agaton sa pila ka bahin sang probinsya.
Ini ginalakipan sang barangay Latawan, Tady kag Del Castillo.
Sa interview sang Bombo Radyo kay Mayor Jon Aying, iya ginpahayag nga sa bahin sang Latawan,mabudlay ini kadtuan bangud dako ang suba nga tabukon kag mabaskog ang pagdaludo sang tubig.
Suno kay Aying, sa bahin sang Tady, may yara man sang landslide kag sa Del Castillo, dako man ang sapa nga kinahanglan tabukon.
Samtang, padayon man ang search and retrieval operation sa missing nga 16-anyos nga lalaki ang nga residente sang Barangay Apologista, Sara, Iloilo.
Una na nga nakarecord sang casualty ang Sara sa diin ang biktima amo si Florentino Dema-ala, 62-anyos, residente sang Barangay Ardemil nga ginaalegar naanod sang tubig-baha sang nagtuyo nga magtabuk para maluwas ang kaugalingon.
