ILOILO CITY- Ginahulat nalang sang Department of Education(DEPED) Region 6 ang order halin sa central office may kaangtanan sa gina-propose nga pagbukas sang school year 2022- 2023 sa Agusto 22 sa tinutuyo nga mapadamo pa ang in-person classes sa blended learning.
Sa interview sang Bombo Radyo kay Mr. Hernani Escullar, spokesperson sang DEPED Region 6, iya ginpahayag nga base sa proposal, ang school year 2022-2023 ang magatakop sa Hulyo 7,2021 ukon may kabug-usan nga 215 ka adlaw.
Ang kada quarter ang magalawig sang 11 ka semana.
Ang first quarter- Agusto 22 tubtob Nobyembre 4; ang second quarter- Nobyembre 7 tubtob Pebrero 3; ang third quarter- Pebrero 13 tubtob Abril 28; ang fourth quarter- Mayo 2 tubtob Hulyo 7
Ang Christmas break ang magasugod sa Disyembre 19, 2022 kag magabalik sa Enero 2, 2023.
Ang end-of-year rites ukon graduation ceremonies ang ginalauman nga patigayunon sa Hulyo 10 tubtob 14, 2023.
Ang school year 2023-2024 ang ginapanan-aw naman nga magabukas sa Agusto 28, 2023.
Sa subong suno kay Escullar, padayon pa ang validation sa 21 ka mga schools divisions sa rehiyon kun sa diin as of MArch 23 nga data, yara sa 210 ka mga eskwelahan ang handa na para expansion sang limited face to face para sa bag-o nga school year.
