Gin-anunsyo sang Russia nga madinalag-on sini nga napalupad ang Sarmat intercontinental ballistic missile. Ini ang bag-o nga missile sa nuclear arsenal sang Russia — nga kun si Russian President Vladimir Putin pa ang pahambalon — rason kun ngaa dapat magduha-duha na ang ila nga mga kasumpong antes pahugon ang Moscow.
Apisar madinalag-on ang test-launch, indi pa pwede magamit ang amo nga missile.
Suno sa Russian Defense Ministry, ini pa lang ang una nga test launch sang Sarmat intercontinental ballistic missile.
Sarang lang ini makabig nga kabahin na gid sang nuclear arsenal sang Russia kun makumpleto na sini ang testing program.
Sang 2018 una nga ginpahibalo ni Putin sa publiko nga gina-develop sang Moscow nang Sarmat.
Apang ang pag-test launch sini sa adlaw sang Myerkules ang ginalantaw nagapabati-bati sang isa ka daku nga mensahe samtang nagapadayon gihapon ang away sini batok sa Ukraine.
Suno kay Putin, ini ang may “highest tactical and technical characteristics” kag makasarang ini nga pierdehon ang mga moderno nga anti-missile defense.
Suno sa Russian leader, wala ini sang kapareho sa kalibutan, kag wala sang mangin kapareho sa sulod sang malawig nga tion.
Sandig sa mga espekulasyon sang analysts, posible nga magapamahog si Putin sa paggamit sang nuclear weapons agud matabog ang Western countries nga nagasuporta sa Ukraine.
Posible man nga tikang ini ni Putin agud mapa-surrender na ang Ukrainian forces.
Makit-an sa footage nga gin-release sang Defense Ministry ang isa ka puti nga missile halin sa underground sa Plesetsk Cosmodrome sa northwest Russia.
Naigu sini ang target sa Kamchatka Peninsula nga may kalayuon nga 3,500 miles sa nasidlangan. ##
