ILOILO CITY- Ginsentensiyahan sang duha ka tuig kag duha ka bulan nga pagkapreso ang isa ka 56-anyos nga lalaki nga napamatbatan nga guilty sa pagmolestiya sa isa ka paralisado nga pasyente sa ospital kun sa diin ini nagatrabaho bilang cleaner sa Singapore.
Wala ginpangalanan ang biktima nga 42-anyos nga babaye nga indi makahulag ukon makahambal samtang ang wala man ginpagwa ang identity sang offender agud maproteksyunan ang imahe sang ospital.
Suno kay District Judge Kessler Soh, tuman ka bug-at sang degree sang sexual intrusion kun sa diin ginhurikap kag ginkumos sang lalaki ang dughan sang babaye.
Sang amo nga tion, naaktuhan gid sang nurse ang ginahimo sang janitor.
Gin-ako man sini ang pagmolestiya sa pasyente apang ang rason niya amo nga may ginasuprir ini nga schizophrenia kag may naghutik sa iya nga tandugon ang pasyente.
Apang wala sang nakit-an nga bug-at ang huwes sa rason sang offender.
