ILOILO CITY– Dismayado ang local labor rights group nga General Alliance of Workers Association (GAWA) bangud sa liwat- liwat na lang nga postponements sang hearing sang Regional Tripartite Wages and Productivity Board (RTWPB) para sa ginaduso nga wage increase sa Western Visayas.
Sa interview sang Bombo Radyo kay Wennie Sancho, secretary-general sang GAWA kag labor representative sa RTWPB, iya ginpahayag nga ang mga panibag o nga petsa para sa hearings ang patigayunon sa Mayo 12 kag 13.
Ang orihinal nga petsa ang dapat kuntani sa Abril 12 kag 13 ang gin-isol sa Abril 22 kag Abril 23 kag liwat nga gin-schedule sa palaabuton kuntani nga Abril 28 kag 29.
Suno kay Sancho, isa sa mga rason kun ngaa ginpostpone ang hearings amo ga indi makatambong ang mga wage board members.
Pahayag niya, nagakadapat kuntani nga mag-proceed ang hearings apisar nga absent ang mga board members bangud mahimo man ang mga ini nga magpadala sang tiglawas.
Nagasuspetsa man si Sancho sa liwat- liwat nga postponements bangud mangin siya ang wala nakabaton sang rason sang mga wage board members kun ngaa absent ang mga ini.
Nahibaluan nga sa petisyon nga ginpasa sa wage board, ginaduso sang Fishta Union of Employees for Reforms Through Solidarity Actions (FUERSA-SUPER) ang P750 nga daily minimum wage para sa private sector sa Region 6.
Ang nagaeksister nga daily minimum wages sa rehiyon amo ang masunod: para sa non-agriculture / industrial / commercial – P395 sa mga may yara sang masobra sa 10 workers kag P310 sa mga naga- employ sang 10 workers panubo; para sa agriculture – P315
Ini nga rates ang ginpatuman humalin sang Nobyembre 26, 2019.
Wala sang wage increase humalin sang 2020.
