ILOILO CITY- Labi pa nga nagadamo ang mga Overseas Filipino Workers(OFW) nga na-infect sang COVID-19 sa Shanghai, China.
Suno kay Bombo International Correspondent Cristina Caspillo direkta sa China,kapin sa 20 na ka mga OFWs ang na-infect sang virus kag posible nga may iban pa nga Filipino nga wala lang naga-report sa Philippine Consulate sa Shanghai gani mahimo nga mas madamo pa ang OFWS nga infected.
Nahibaluan nga yara sa 4,000 ang mga Pinoy nga nagatrabaho sa Shanghai.
Sa subong suno sa natungdan nga isa ka empleyado sa hotel, amat-amat naman nga napahalugan ang mga protocol bangud kun sadto, indi sila mahimo maggwa sa ila room, sa subong ginatugutan na sila nga makagwa apang kutob lang sa vicinity sang hotel.
Samtang,ginpahayag ni Caspillo nga mangin ang kapital nga Beijing ang nagapangaman man sa posible kaangay man nga scenario nga matabo sa ila.
Suno kay Caspillo, kahapon sang nagsugod ang ginabanta 75 % sang 22 million ka tawo sa Beijing sa pag-line up para sa COVID-19 tests bilang lihok agud malikawan ang pagluntad sang outbreak.
Ang mga pumuluyo sang Beijing ang nagsugod man sa pag-stock sang pagkaon kag iban nga supplies sa kabalaka sang posible hinali lang ipatuman nga localised lockdowns.
As of April 25, ang Beijing naka-record sang 33 ka bag-o nga COVID-19 cases.
