ILOILO CITY – Ginpaidalom sa Commission on Elections (COMELEC) control ang Marawi City kag pito ka iban pa nga banwa sa Mindanao.
Ini ang kasunod man sang recommendation sang government security forces.
Ang mga banwa nga ginpaidalom sa COMELEC control amo ang mga masunod:
Sa Maguindanao: Buluan, Datu Odin Sinsuat, Datu Piang, Mangudadatu, Pandag, kag Sultan Kudarat.
Samtang ang Marawi City kag Maguing naman sa Lanao del Sur.
Nahibaluan nga ang Marawi City ang ginpudpud sang lima ka bulan nga pagpakig-away sang otoridad batuk sa ISIS-linked Maute group.
Suno kay COMELEC chairman Saidamen Pangarungan, ginpaidalom sa COMELEC control sang Committee on the Ban on Firearms and Security Concerns (CBFSC) ang ini nga mga lugar base sa joint recommendation sang Philippine National Police (PNP), Armed Forces of the Philippines (AFP) kag ni Bangsamoro Autonomous Region in Muslim Mindanao (BARMM) director Ray Sumalipao.
Una na nga ginpaidalom sa COMELEC control ang Tubaran kag Malabang sa Lanao del Sur.
Sa idalom sang COMELEC Resolution No. 10757, ang isa ka lugar ang mahimo nga mapaidalom sa COMELEC control sa idalom sang masunod nga mga sirkumstansya:
Una, may yara sang history sang intense rivalry sa mga pulitiko sa lugar.
Mahimo man mapaidalom sa COMELEC control ang isa ka lugar sa tion nga may yara sang insidente sang politically-motivated violence nga ginakaulamiran sang mga kandidato kag supporters; may kinagamo nga tuga sang private armed goups kag may seryoso nga armed threats nagikan sa violent goups.
Ang poll body ang may yara na sang gin-identify nga 104 ka “areas of election concern” sa bilog nga pungsod.
