Nalipay ang mga residente kag ang mga opisyal sa Mandurriao matapos nga nagpasugot ang Iloilo City Government nga ibalik ang daan nga ruta sang mga jeep sa amo nga distrito apisar nga lain na kuntani ang route structure sa idalom sang Local Public Transport Route Plan (LPTRP).
Ang pagpasugot sang city government ang kasunod sang sulat nga ginpadala sang Barangays Block 22, Block 17, Sta. Rosa, Dungon C, kag Pali kay Iloilo City Mayor Jerry Treñas.
Sa interview sang Bombo Radyo kay PHHC Block 22, Mandurriao Punong Barangay Richard Robert Dolar, iya ginpahayag nga nag-inform na ang syudad sa mga transport cooperatives nga magbalik na sa daan nga ruta.
Nahibaluan nga sang temporaryo nga gindula ang daan nga mga ruta umpisa sang ginpatuman ang LPTRP, nagsakay pa ang mga residente sa tricycle padulong sa plaza sang Mandurriao agud makasakay sa depamsahero nga jeep padulong sa syudad kag sa Jaro.
Tuman ini kabudlay para sa mga tigulang suno sa kapitan, kag doble man ang gasto sang mga tawo sa ila nga plete.
Una naman nagpaathag ang City Government nga ginpasugtan ang hingyo sang mga punong barangay bangud nga indi pa man modernized jeepney units ang nagabyahe kag makasulod pa man ang traditional nga mga jeep sa amo nga mga barangay.
Kun magsugod na byahe ang mga modernized jeepney units, dapat hawanan ang mga dalan suno sa city government bangud mas daku ang mga modernized jeepneys ipaanggid sa traditional nga mga unit. ##
