Lakip sa ginalauman ni Iloilo City Mayor Jerry Trenas nga maplastar ni President Ferdinand ‘Bongbong’ Marcos, Jr. sa iya labing-una nga State of the Nation Address (SONA) amo ang plano sa agrikultura, Covid-19 response, kag kun ano ang plano sa nagatimbuok nga utang sang gobyerno.
Lunes, Hulyo 25, natalana ang una nga SONA ni Marcos bilang ika-17 nga presidente sang pungsod.
AGRIKULTURA
Sa interview sang Bombo Radyo sa alkalde, iya ginpahayag nga posible nga diri na iplastar ni Marcos (tiglikom man sang DA) ang iya nga plano kun paano mabuligan ang mga mangunguma nga nagapanawagan sang mas barato nga abono sa tunga sang gina-suprer nga global food crisis.
Una nga problema suno sa alkalde, bangud mahal ang presyo sang produktong-petrolyo kag abono, apektado man ang produksyon sang mga nagapanguma.
Sa nauna nga mga pahayag ni Marcos bilang DA secretary, ginplastar sini nga magahimo ang ahensya sang farm-to-market roads masterplan kag himuon prayoridad ang mga malayo apang produktibo nga mga lugar.
Ikaduha pa nga problema sa agrikultura nga gin-cite sang alkalde amo ang mahal nga gasto sa farm inputs apang barato nga farmgate price.
COVID-19 RESPONSE
Ginalantaw man sang alkalde nga mabatian ang Covid-19 response plans sang bag-o nga administrasyon.
Halos isa ka bulan matapos nagpungko si Marcos bilang presidente, wala pa sang nabutang nga tiglikom sang Department of Health (DOH). Si Dr. Maria Rosario Vergeire ang nagapungko lamang bilang officer-in-charge.
Isa pa sa ginaduso subong suno sa alkalde amo ang pagpa-avail na sang ika-duha nga booster shot sa general population. Sa subong, limitado lamang ang pag-administer sang fourth vaccine shot sa health workers, immunocompromised, kag senior citizens.
Concern man suno sa alkalde ang kakulang sang Covid-19 vaccines para sa mga bata nga natalana na nga magbalik sa face-to-face classes sa Nobyembre sini nga tuig.
UTANG SANG PILIPINAS
Magluwas diri suno kay Trenas, ginalauman man kun ano ang mga iplastar sa tunga sang tuman ka taas nga utang sang gobyerno sang Pilipinas. Ini bangud — pigado man ukon manggaranon — may salabton sa sini nga utang.
Kun basehan ang pahayag sang economic think tank nga IBON Foundation, kun tungaon ang P12.5-trillion nga utang sang gobyerno sa 110 million nga populasyon sang bug-os nga Pilipinas, kada Pilipino ang may yara sang balayran nga P112,678.
Kun tungaon naman ini nga utang sa kada pamilya, kada pamilya ang may yara sang P474,543 nga salabton bangud may 26.3 million families nga counted sa pungsod. ##
