Nagpasalig ang Department of Health (DOH) nga preparado ang Pilipinas para sa posible matabo nga monkeypox outbreak sa pungsod.
Kasunod ini sang pahayag sang World Health Organization (WHO) nga isa na ka “public health emergency of international concern” ang amo nga balatian.
Suno kay DOH Officer-in-Charge Maria Rosario Vergeire, halin pa sang na-report ang mga kaso sini sang Mayo 2022 sa iban nga mga pungsod, nag-umpisa na sa pagpanghanda ang health department.
Sa subong, wala sang kumpirmado nga kaso sang monkeypox sa Pilipinas.
Suno sa DOH, na-draft na, naaprubahan, kag nag-circulate ang interim technical guidelines sa implementasyon sang monkeypox surveillance, screening, management, kag infection control.
Na-optimize man ang Research Institute for Tropical Medicine para sa Realtime PCR assay sa pag-detect sang monkeypox virus. ##
