73 minutos ang ginlawig sang labing-una nga State of the Nation Address (SONA) ni Presidente Ferdinand ‘Bongbong’ Marcos, Jr.
Yari ang mga dalagku nga isyu sa Pilipinas nga wala namunuhan sa amo nga speech:
HUMAN RIGHTS KAG WAR ON DRUGS
Wala sang na-mensyonar si Marcos sa iya nga speech nga nagapatuhoy sa isyu sa tawhanon nga kinamatarong kag sa kontrobersyal nga war on drugs.
Ini apisar sa idalom sang administrasyon ni former President Rodrigo Duterte, ginapakita sa rekord sang pulis nga masobra sa 6,000 ang nagkalamatay samtang ginpatigayon ang anti-drug operations halin sang Hulyo 2016. Gina-claim sang rights group nga masobra sa 30,000 ang nagkalamatay.
Apisar una na nga nagpahayag sang intensyon si Marcos nga padayunon sini ang drug war apang sa lain nga paagi, wala niya gin-athag kun maga-kooperar siya sa imbestigasyon sang International Criminal Court (ICC).
LABOR ISSUES KAG CONTRACTUALIZATION
Apisar nga nahambalan sa SONA ang agrarian reform, pigado nga workplace conditions, kag intellectual property problems, kag issues sang overseas Filipino workers, wala na-mensyonar ang iban pa nga mga isyu sang mga mamumugon.
Lakip diri ang nagalala nga isyu sa kontraktwalisasyon. Matandaan nga sa lakip sa campaign promise ni Duterte ang pagtapos na sa endo contractualization, apang gin-veto man sini ang Anti-Endo Bill.
MGA ‘PAANO’ SA BLENDED LEARNING
Sa iya SONA, ginsulit ni Marcos nga naga-preparar na ang Department of Education para sa pagbalik sang face-to-face classes sa Nobyembre.
Apang antes sang SONA, may pahayag ang presidente nga mahimo gihapon mapatigayon ang blended learning sa pila ka mga lugar kun may makit-an nga mga problema. Ini apisar may DepEd Order 32 s. 2022 si Vice President kag DepEd chief Sara Duterte-Carpio nga nagasiling nga indi na pwede ang “purely distance learning” kag blended learning sa bisan diin nga eskwelahan kun maglapaw na sa October 31.
ISYU SA WEST PHILIPPINE SEA
Ginsiling ni Marcos nga may “friends to all, enemy to none” foreign policy ang iya nga administrasyon, apang wala sini namensyonar ang partikular nga tensyon nga nagapatunga sa Pilipinas kag sa China bangud sa away sa West Philippine Sea. Sa iya speech, may standing ovation kag pagpalakpak nga ginhimo sang ginsiling ni Marcos nga indi siya mag-preside sa proseso nga maga-abandon bisan sa square inch lang sang territory sang Republic of the Philippines sa bisan ano nga foreign power.
LONG-AWAITED APPOINTMENTS
Wala namensyonar sa SONA ni Marcos kun sin-o na ang iya nga iga-appoint ukon ano ang iya nga plano sa Commission on Human Rights (CHR) kag sa Presidential Commission on Good Government nga amo ang may assignment sa pag-recover sa ginapahayag ill-gotten wealth sang iya pamilya kag ila cronies.
ANTI-CORRUPTION MEASURES
Wala sang naplastar si Marcos nga specific anti-corruption program nga amo ang makatapna sang plunder kag graft and corruption nga nagatabo sa pungsod.
BARANGAY AND SK ELECTIONS
Wala man naplastar sang presidente sa iya SONA kun pabor ini nga dayunon ukon i-postpone ang Barangay kag SK elections sa Disyembre.
Una na diri, nagpahayag na si Senate President Juan Miguel Zubiri nga mahulat ang Senado sa SONA antes mag-desisyon kun magpasar sang hagna nga ipaiway anay ang eleksyon.
Si House Speaker Martin Romualdez naman ang nagapabor nga i-postpone anay ang local polls.
Nahibaluan nga ginaduso subong sa Kamara kag sa Senado nga ipaiway anay ang pagpatigayon sang Barangay and SK elections sa palaabuton nga Disyembre. Pila sa mga gintumod rason sang mga mamalidha amo ang pagpain anay sang P8 billion nga budget para sa pagtapna sang COVID-19 surge sa Pilipinas. May mga naga-rason man nga gin-tunga gid sang bag-o lang nagtakop nga 2022 national and local elections ang electorate rason nga dapat anay hatagan pa sang gamay nga tyempo.
Sa bahin sang Commission on Elections (Comelec), una na ini nga naghingyo sa Kongreso nga mag-desisyon na gilayon kun dayunon ukon indi ang eleksyon bangud kinahanglan man nga i-konsiderar ang preparasyon sang poll body. #
