ILOILO CITY – Masako na ang pagpanghanda ni Binibining Pilipinas International 2021 Hannah Arnold para sa iya competition sa international stage sa December sa Japan.
Suno kay Hannah, may yara pa siya sang pila pa ka bulan kag nagatutok siya sa pasarela, sa iya diet, pagbasa kag pagpabilin nga updated sa mga nagakatabo sa palibot.
Ang Miss International 2020 kag 2021 pageants ang gin-postpone bangud sang COVID-19 pandemic.
Ang 2022 edition naman ang madayon na subong nga tuig kag maga-focus sa Sustainable Development Goals kag sa advocacy sang United Nations.
Suno pa kay Hannah, may yara sang project nga i-release bilang kabahin sang pageant nga amo man ang ginatutukan niya.
Gin-ako man sini nga ang iya nga pasarela ang indi mabaskog apang ginpasalig niya ang mga fans kag supporters nga sa Miss international, may yara siya sang bag-o nga ipakita sa tanan.
Ginakabig naman niya nga unforgettable ang mga tion nga nakaupod niya ang mga Bb. Pilipinas staff.
Suno sa iya, masubuan siya sa tion nga matapos na ang iya nga reign apang suno sa iya, posible nga magabalik siya sa gihapon sa Araneta kag magtambay.
Si Hannah ang isa ka model kag nagtapos sang iya Bachelor of Applied Science in Forensic Studies degree sa University of Canberra sa Australia.
Ang iya iloy ang isa ka Filipina samtang ang iya amay ang isa ka Irish-Australian.
Ang reigning Miss International amo si Sireethorn Leearamwat sang Thailand.
Anum na ka Miss International winners ang na-produce sang Pilipinas nga amo sanday Gemma Cruz Araneta sang 1964; Aurora Pijuan sang (1970); Melanie Marquez (1979); Lara Quigaman (2005); Bea Santiago (2013); kag Kylie Verzosa (2016).
Samtang, ang coronation night sang Bb. Pilipinas 2022 ang hiwaton sa Domingo, July 31 sa Smart Araneta Coliseum.
40 ang mga kandidata nga magapasakop kag ang magadaog, maga-represent sa pungsod sa Miss International, Miss Grand International, Miss Intercontinental, kag Miss Globe.
Balantayan man ang pagbalik sang pambato sang Iloilo City nga si Karren Laurie Mendoza sang Concepcion, Iloilo.
